الشاعر.. أحمـــــد مصطفى الهـــلالـــي يكتب........ أنا والهلالي
أنا والهلالي
أحمد مصطفى الهلالي
**********
واخدني من زحام نفسي
لراحة بالي وعيوني
منوّر عتمة الأيام
ومتصالح على سنيني
وإيه يعني تقابلني؟
وأشوف الود في عيونك
بيحكي عن سبب سعدي
ويفتح باب مواويلي
وإن بان الورق دبلان
يبان ف الورد مكنوني
وشوش تعبت من التمثيل
وساكنه رعبها الخالي
تباهي بالعفن روحها
وتلبس ف الضلال تيجان
بنتجاهل ومش باين
لكن جوانا ألف لسان
بيفضح ريحة الخيبة
في ضحكة باهتة مصنوعة
وآهة ليل غريب الحال
بتصرخ حافية مفزوعة
وأنا وياك على المينا
نعد الموج فيهدا الحال
نسينا نباح سِكن روحهم
قفلنا في وشها ميت سد
رسمنا م الهوا جنة
تنسينا سنين الكرب
نضم البحر ف ضلوعنا
وفي الموجة وفي قلوعنا
قطار الحزن بان فـ الدرب
وكاتب قسمته رجوعنا
فيا صاحب "خُطى أيامي"
ويا راسي بهواك ع البر
مادام القلب عاش يحلم
فـ "طُز" في كل ريح بتمر
نعد الموج ونتبسم
لضحكة جاية من العالي
ونكتب ع الرمل قصه
"سعيد الحظ.. هاني البال"
ما عُدش شيئ يخوفنا
ولا يشغلنا موج او جذر
عشان إحنا ملكنا النور..
وسبنا الكدب لصحابه
معادش الشوق بيتعبنا
ولا نفتح له بوابه
مراكبنا ع المضمون
بحار الطيبه ويانا
وفجر الرحله شق طريق
وزحمه همس علي بابه
مادمنا ف الهوا عايشين
يطيب القلب.. وأحبابه
*****
أحمـــــد مصطفى الهـــلالـــي
تعليقات
إرسال تعليق